БЕЛАРУСЫ – ЛЮДЗІ РАЗУМНЫЯ, ГЛЯДЗЯЦЬ НА НЕКАЛЬКІ КРОКАЎ НАПЕРАД

Члены прафсаюза работнікаў АПК Нясвіжскага раёна актыўна абмяркоўваюць праект змяненняў і дапаўненняў Канстытуцыі Рэспублікі Беларусь.

Пётр Губей, механізатар дзяржаўнага прадпрыемства “Эксперыментальная база “Свеклавічная”:

— Уважліва знаёміўся з дапаўненнямі і змяненнямі Канстытуцыі Рэспублікі Беларусь, з Пасланнем Прэзідэнта. Абмяркоўваем гэтыя пытанні ў сям’і, з дзецьмі – яны ўжо дарослыя, маюць свой пункт гледжання. Падтрымліваем палітыку нашай дзяржавы. Усе пойдзем на рэспубліканскі рэферэндум, аддадзім свой голас за абноўленую Канстытуцыю. Асабіста я галасую на Ударненскім выбарчым участку.

Мне вельмі імпануе, што ў нас медыцына і далей будзе бясплатная. Сацыяльна-арыентаваная дзяржава вытрымлівае дадзены параметр. Гэта вельмі важна і істотна. Падтрымліваю таксама новы тэзіс, унесены ў артыкул 81: Прэзідэнт будзе выбірацца не больш чым на два тэрміны. Лічу так: беларусы – людзі разумныя, глядзяць на некалькі крокаў наперад. І ўсё ў нас будзе добра!

Асабіста я, шмат гадоў аддаўшы працы на зямлі, паважаю высокае званне хлебароба. Зараз чакаем вясну. Свой трактар, якому ўжо 16 гадоў, адрамантаваў, засталося пафарбаваць. Збожжавую сеялку, а ёй 8 гадоў, паставіў на лінейку гатоўнасці да Новага года. Тэхніка служыць доўга і добра, бо я гляджу яе. У гаспадарцы своечасова закупілі запчасткі, і да вясновых палявых работ падыходзім у поўнай гатоўнасці, з баявым настроем. Рад, што працую для людзей, дзеля дабрабыту сваёй дзяржавы.